مجموعة مجلات العمدة الشاعرسيدالاشول الألكترونية للشعر و الأدب

مربعات بعنوان بوصف في حبك

بوصف في حبك وافنن
ع الناى وصوت الربابه
سهران ليلاتى ادندن
وقلبي مغرم صبابه

بوصف فى حبك وانادى
علي كل مغرم وعاشق
داب في هواها عنادى
سهم الغرام سهم راشق

بوصف في حبك في سِري
وبير الغرام سوره عالي
هواكى عنى بيسَرى
وربى عالم بحالى

بوصف في حبك بوصفى
ووصفى اكيد مش كفايه
ولا وصف ممكن يكفي
واحنا يادوب في البدايه

بوصف في حبك معارف
الاقى جمله تناسب
انا زرت دار المعارف
قبل اما آجى واناسب

بوصف في حبك ما سامع
غير صوت قليبى اللي دقدق
فرح جميع المسامع
فجر الغرام جه وشقشق

بوصف في حبك ما لامح
جمله تضاهى الجمال ده
يكفيكى حسن الملامح
لو حتى ليا معانده

بوصف في حبك فدادين
يوماتى قلبي قايسها
وهبك حياته فِدا دين
وواقف عليها حارسها

بوصف في حبك وجارى
ميت الف يتمنوا نظره
فاكرينى ليهم ح اجارى
واعمل ما بينهم مناظره

بوصف في حبك وشايف
الغل جوه المنازل
فاهم في لغة الشفايف
يكفيكى كيد العوازل

بوصف في حبك يا زينه
عايش بضحكة شفايفك
نهايتي لو يوم حزينه
دا قلبي هو اللي شايفك

بوصف فى حبك شقاوه
اترجى يعجب جنابك
سايقه الدلال وبغباوه
يخرب مطن اللي جابك
هههههههه

بوصف في حبك وطبلك
حاضن صاجات الرِق
هو انت المى طايبلك
مش ناوى ابدا ترق

بوصف في حبك يانوسه
واللا انتى اسمك وداد؟
اهى دى مصيبه وحوسه
ناسي ان اسمك سعااااد
هههههههه

بوصف في حبك وحَرفي
طالع من قلب شاعر
انا اصلي مِهنى وحِرَفي
دارس لفن المشاعر

بوصف في حبك جدايل
ولسه دايما تزنّى
وحياة ابوكى ما قايل
امشي ابعدى عنى

بوصف في حبك غتاته
مكار ياقلبي ولئيم
دايما بيهوى الشحاته
من بين ايادى الحريم
ههههه

بوصف في حبك بروحى
وروحى ملك ليمنيك
احلف تداوى جروحى
قلبي مصدق يمينك

بوصف في حبك واقول
عيش الحياه بِلا هم
فيه ناس ناقصها العقول
محلا الحياه بلاهم

محمود ناصر